ඔබ මගේ වෙන්න සංසාරෙම පුරාලා.....

 ඔයාගෙම වෙන්න...ඔයාගෙම විතරක් වෙන්න.... මම හීන අහුළපු තරම් ඔයාවත් දන්නෙ නෑ.පෙරුම් පුරල පෙරුම් පුරල හැබෑ කරගත්ත ඒ හීන එළිවෙන අද දවසෙ මම හිනාවෙන්නද අඬන්නද කියලවත් මටම නිනව් නෑ.දන්නවද අද මම හිනාවෙන්නෙ සතුටට ... අඬන්නෙ ඒ සතුට දරාගන්න බැරි කමට....

ඉතිං ඇස් වලට කඳුළු ඉනුවට බොරුවට මට රවන්න එපා...මේ සතුටු කඳුළු රත්තරං...


පුර සඳක් වෙලා සිත් අහසේ පිපීලා
මල් තුහින වලාවක පාවී ඇදීලා
දේදුණු යායක පෙම් හීනය මවාලා
ඔබ මගේ වෙන්න සංසාරෙම පුරාලා....

සුදු මුඳු පහසින් මා සිරුරම වෙළාලා
සෙනෙහසේ තිළක මා නළලත තබාලා
තෙත අඩි තිය තිය හිත මත්තෙම සරාලා
මා ලඟට ගන්න මගෙ ලෝකය පුරෝලා...

පෙම් කුරුළු කූඩුවක් ලගදිම තනාලා
තව දුරින් ඉන්න බෑ සීමා බිදීලා
තුටු කඳුළු වලින් ඔය සුදු පා දොවාලා
සඳ සෙවනැල්ලේ යට සැනසෙමු නිවීලා....