දිනූ මගේ යකෝව්....!

මෝඩ තරිඳු බැලුවාය.කෙටියෙන්ම කියනවා නම් මරුය..මරේ මරුය.සතියේ දවසක 7.30 ශෝ එකද හවුස්ම ෆුල්‍ ය.මියුසික් අතිවිශිෂ්ටය..හැමෝගෙම ඇක්ටිං ද එහෙමය.මං වැඩියෙන්ම කැමති සේවියර් කොලුවාටය.ඒ රඟපෑම් නියමය.ෆිල්ම් එක ගැන මරේ මරු කිව්වාට පසු තව කියන්නට දෙයක් නැත.දැන් ෆුල් මාවලස් වී ඇත්තේ මෝඩ තරිඳු බලා ආවාට පසු අපේ ගෙදර තත්වයය..

ෆිල්ම් එකේ හොදම සීන් එක මුලින්ම එද්දී සභාවේ සිනා හඩ මැද්දේ ඊට වඩා හයියෙන් 

තාත්තේ ..ඩිස්ටි ඩිඩින් කියන්නේ මොකද්ද.. කියා ඇහුවාය.

හොද වෙලාවට තාත්තගෙන් ඇහුව නිසා මං බේරුණාය.මං මගේ එකෙක් නෙවෙයි වගේ අහක බලා ගත්තාය.තාත්තා ජාමේ බේරාගෙන ඇත්තේ ඒ ඩාන්ස් එකට කියන නම කියාය.දැන් ඒකා හිටපු ගමන් ගෙදර අපිට ඩිස්ටි ඩිඩින් නැටුම නටා පෙන්නනවාය.කුලප්පු වෙච්චි  අස්සයෙක් වාගේ ඔලුව හොල්ල හොල්ල චූ බර හදා පෙන්නනවාය..මරුය..මරේම මරුය..

අපි නොදැක්කා  සේ ඉන්නවාය.පුතේ ඔය නාඩගං ඉස්කොලෙ ගිහින්නම් කරන්නට එපාය කියන්නට මගේ කට පොපියනවාය...ඒත් කියන්නට බැරිය.එපා කිව්වොත් වැඩියෙන් කොරන එක ඒකාගේ හැටිය.. ඒ නිසා පාඩුවේ ඉන්න එක කෝකටත් හොදය..

ඒ විතරක්‍ නම් මදෑ මටද දැන් වැඩියෙන් චූ බර හැදෙනවාය..ඒ හැදෙන හැදෙන පාරට මට හිතෙන්නේ ගිය ආත්මේ මගෙන් බූටක් කාපු එකෙක් මට අන වින කොරනවා ඇති කියාය..අනේ මගේ හිත හැදෙන්න කියාපල්ලා මේ එහෙම එකක් නෙවෙයි මේ දවස්වල සීතල නිසා වෙන්න ඇති කියලා 🙂😇

මල් සමය නිම වේවිදෝ

 

සුන්දර සුවබර බිනර මාසයක් වේවා  ඔයාලට!💐💐💐

බොහොම අවිවේකී සති අන්තයකට පස්සෙ සදුඳාට එළිය වැටුනේ අලුත් මාසයක් එක්කමයි.සැප්තැම්බර් ඒ කියන්නෙ බිනර මාසේ.නිකිණි කියන අගෝස්තු මාසෙට වගේම මං බිනර  කියන සැප්තැම්බර් මාසෙටත් හරිම මනාපයි.අපේ අම්මා මට ඔය  නම දාලා තිබුනනම් මං මොන ලෝකෙන් හරි බිනර කියන නම තියෙන කොල්ලෙක් හොයා ගන්නවා ඒ කාලේ.කොහෙද ඉතින් අපේ අම්මට ඕව තේරෙන්නෙ නෑනේ. (මේක පෝස්ට් කරන්න කලින් අම්මට නොපෙනෙන්න settings  හදන්න ඕනේ නැත්‍තං මේ පින්බර උදෑසන අම්මා මට ජාතිය අමතනවා🤭 ) මං නිකිණි කෙනෙක් නොවී මට බිනර කෙනෙක් හම්බුනේ නැති සෝකෙට මං ලියන ගොඩක් කතාවල ඒ නම් දෙක තියෙන ඩබලක් ඉන්නවා.ඔයාලට කියන්න පූරුවේ ඉදන් එන මොකද්දෝ කෝන්තරේකට මට සෙට් වෙන්නෙම  " චා " යන්නමයි.ඒ අකුර මට අපලයි කොහෙද ඉතිම් මේ දෛවය ඒක පිලිගන්නෙම නෑනේ. බලන්න  ඒක උච්චාරණය කරද්දිම මොකද්දෝ වරදක් තියෙනව නේද කියල ( පොඩ්ඩක් ඉන්න හබී බබීවත් බ්ලොක් කරල තමා මේක දාන්න වෙන්නෙ නැත්තං නිවාඩු දවසෙ කොහේ හරි ගිහිල්ලත් හමාරයි 🙃)

හුටා මට අමතක උනානේ ඔය කලින් පෝස්ට් එකේ නිදි නැති රෑ නැටූ නාඩගම ගැන ලියල එයැයි මට රෙනෝගෙ cctv එක කියල කුප්ප කතා කියල තිබ්බනෙ.එයැයි එහෙම කිව්වයි කියල මං සැලෙනවද හිතවත.මට ඕන්නං අර ඉස්සරහට එයි කියල එයා හිතන ලියවිලි ගැන අදම ලියන්න පුලුවන්.ඒ උනාට ඕන්නෑ ඉස්සරහට තමා වඩා රසවත් ඒ නිසා රැඳීසිටින්න ඕගොල්ලො හොදේ.

ඉතින් ඔයාලා හිතන්නේ දැන් අපිට උදේට කැඳ නෑ කියලද.මොන පිස්සුද අනේ කැඳ නම් වරදින්නේ නෑ.නානාප්‍රකාර කොළ කැඳ, කුරක්කන් කැඳ,කොල්ලු කැඳ අපිට ලැබෙනවා හිතවතුනි.නැන්දම්මාගේ කැඳ හැදිල්ලයි අපේ අක්කාගේ මල් පිස්සුවයි  අස්සේ මාත් ඔන්න ඔහෙ ඉහගහල ඉන්නව තාමත්. ආ..ඔය පහුගිය දාක අපි නුවර පලාතේ ගියා නොවැ.කියන්න දුකයි  අපේ අක්කගෙ මල් රෝගයේ විසබීජ ගිහින් ආතුර වෙලා මාත් සල්ලි දීල මල් පැල අරන් ආවානේ.🙄 අක්කාටනම් දැන් මල් පිස්සුව විතරක් නෙවෙයි ගෙඩි පිස්සුවත් තියෙනව.උන්දෑ උස්සන් ආවා පැනි දොඩම් ගහක්.අනේ හොදා මං හිතුවා එයැයිගෙයි මගෙයි මුනුබුරන්වත් ඒවායේ ගෙඩි කාවිනේ කියල.මොන පිස්සුද ඒකි කියපි  ඒවා බට් ය.අවුරුද්දෙන් ගෙඩි එනව කියල.එයාට කියල තියෙන්නෙත් ගන්නොරුවේ හෙල බොජුන් එකේ පැල තවානෙන්.බලන්න ඉතින් ලබන අවුරුද්දෙ අපිට මේ ගසේ බොහෝ පැනි දොඩම් තිබේ තමා.ඒක හිටවන්න පර්චස් එකහමාරක විතර පෝච්චියකුත් ඇන්න ආවා කියපංකො.දැන් ඉතින් ඕකට පස් පුරවන්න  අර කෙල්ලියො දෙන්නා කන කට්ට මතක් වෙනකොට මට දුකේ බෑ.ඔන්න පැනි දොඩං ගහෙන් තමා ඊළඟට මං එයැයිගෙ ගෙඩි කෙරුවාව දැනගත්තෙ.අම්මටසිරි කිව්වලු දෙහි,අඹරැල්ල,තව මොකක්ද අවුරුදු තුනෙන් පීදෙන ගෙඩියක් ඔය වගේ ගස්  පර්චස්  එකහමාරේ පෝච්චි වල හිටෝලා ස්ලැබ් එක උඩ දිලිසි දිලිසී තියෙනව.පුහ්..එයැයි හිතාගෙන ඇති මල්වලට රැවටුනා වගේ ගෙඩි පම්පෝරියටත් රැවටිලා මටත් ගෙඩි පිස්සුව හැදෙයි කියල.ආයෙ මටෙයි කියල අමුතුවෙන් මොටෝ ගෙඩි ගස්.එයැයිගෙ ගෙඩි මගෙත් ගෙඩි තමා හා නැද්ද  ? 🤭

මල්සමය නිමවේවිදෝ

ගෙඩි සමය ඇරඹේවිදෝ

පසුව ලියමි:

කෝකටත් මං ලබන අවුරුද්දේ නිකිණි මාසෙට නුවර ට්‍රිප් එකට දැන්මම දින වෙන්කරල තියා ගත්ත.පැනි දොඩම් පලදාවෙන් ගිලන්පස පූජ  කරන්න යන්න එපෑයැ.🤭

පසුවටත් පසුව ලියමි :

ඔයැයිලට කියන්න මයේ සැමීගෙ මුල නම චා උනාට එයාට ඊට පස්සේ තියෙනවා සාස්සන නමක්.මං ඒ නමටත් මනාපයි.එයා දුශ්මන්ත මං සකුන්තලා.ආයෙ ඉතින් නිකිණි බිනර වගේයෑ එව්ව බලාපල්ල ගැලපීම 🥰

(මට අද Lady J යන්න 

තියෙනව ළමායි 😉)

**************

මේක මේ බුකියට ලියූවක් නිසා ඒකට ගැලපෙන වාක්‍යයත් තීනවා.ඔන්න ඔහෙ එහෙමම දැම්ම ආයෙ එඩිට් කරන්න බෑ අනේ 

සංගීතයයි ප්‍රේමයයි අනාගෙන රස බැලූ දවසක් !

 

ඉතින් ඔයාලා සැපෙන් සුවෙන්ද?හුඟ දවසකින් මෙහෙ එන්නට බැරිවුනා නොවැ.බිසී බිසී අනේ නානාප්‍රකාර වැඩ.ඒ උනාට ඔයාලට කියන්න කතා නම් එමට තිබුනා.කොහෙද ඉතින් ඒ ඒ වෙලාවට ලියවුනේ නැත්තං ආයෙ ඉතින් ලියවෙන්නෙ නෑ නොවැ.අද කතාවෙත් උණුහුම යන්ට කලින් ලියවුනේ නැත්තං ආයෙ ලියනවා බොරු.ඒ නිසා ඕං අහගන්ඩකෝ.

පහුගිය දාසක අපි ගියා නොවැ  rhythm of the guitar නොහොත් ක්ලැරන්ස් විජේවර්ධන ගේ ජීවිත කතාවේ කොටසක් යැයි කියන ෆිල්ම් එක බලන්න.මං නම් ෆිල්ම් එක ආපු කාලෙම  බලන්න යන්න පෙරුම් පුරාගෙන හිටියේ.ඒ උනාට අපේ ගෙදර අනිත් ඩබලට සිංහල ෆිල්ම් අරහං නිසා ඕකට කිසිම ගෝ එකක් ලැබුනේ නෑ.උන් නාවත් මම නම් තනියම හරි ගිහින් බලමියි එක සිතින් සිතා සිටියත් ඉස්තලන් කොලූගේ විභාගයි ඉස්කොලෙ නානාප්‍රකාර වැඩයි නිසා පහුගිය කාලේ සෑහෙන්න බිසී උනා.අනේ අපි ඉස්කෝලේ යන කාලේ මාසයක් නිවාඩු කියන්නෙ ඉතින් නිවාඩුම තමා ඒකට දැන්.නිවාඩු දෙන්නත් කලින් මුලු නිවාඩු  මාසෙටම schedule එක එවනවා මේ දවසට  athletics,මේ දවසට football අර දවසට මේක අහවල් දවසට මේක කියල.ඇත්තටම බලං යනකොට නිවාඩු කිව්වට  නිවාඩු නෑ මෙයා.

ඕං ඔය නිසා පහු පහු වෙනකොට කොහු කොහු වෙන්නැහෙ පස්සෙ පස්සෙ ඉතින් බලපු කට්ටියගෙ රිවීව් කියවලා යූ ටියුබ් රිලීස් වුන සිංදු එහෙම  බලලා මටත් ඒකේ ආතල් එක ගිහින් තිබුන සමයක අපේ ඉස්තලන් කොලුවා මං ඔය  ෆිල්ම් එකේ මංගෝ සිංදුව බල බල ඉන්න වෙලාවක ඕකට එබිල බලන් හිටියා ටික වෙලාවක්.ඔන්න කොල්ලට ෆිලුමට ආසාවක් ඇති  උනා.අම්මේ අපි ඒක බලමු කියල කැමැත්ත ප්‍රකාශ කල සැනින් පහුවදාම කොලූගෙ තාත්තව බලහත්කාරෙන්ම ලෑස්‍ති කරගෙන ෆිල්ම් එක බලන්න ගියා.

ෆිල්ම් එක මරේ මරුම කියන්න බෑ ඒත් මරු.හරිම සරළයි සුන්දරයි.ඒ ගොඩක් සිංදු අපි දන්න අපි කලින් අහල තියෙන අපි කැමති සිංදු නිසා එයාලත් එක්කම අත්පුඩියක් ගහල සිංදුව ගයමින් එන්ජෝයි කරන්න පුලුවන්.මට නම් ඒක ෆිල්ම් එකක් බැලුවට වඩා මියුසිකල් ෂෝ එකක් බැලුව වගේ ෆීලින් එකක් තමා ආවේ.මං ආසම සීතල කඳුකරේ මනරම් දර්ශන ටිකනම් පට්ට.ඒ වගේම පරණ වාහන දැක්කම පිස්සු හැදෙනවා.තුන් හතර පාරක් ගිහින් තියෙන හපුතලේ ඇඩිශම් බංගලාව යකඩෝ මෙච්චර ලස්සනද  කියල ආයෙ ආයෙ හිතෙන ඇඩිෂම් එකේ ඒ සීන්ස් ටික තමයි මං ආසම. ( දැන් ඉතින් මට ආයෙ ඇඩිෂම් යන්න හිතිල තියෙන්නෙ)ආ ක්ලැරන්ස්ට ඉන්න දමිත් කොලුව හරිම කඩවසම් උස හාදයෙක්. ඒ වගේම නිහාරිත් ලස්සන කෙලි පොඩ්ඩක්.ඒ ඇරුනම ඉතින් කාස්ට් එක ගැනවත් පිටපත ගැනවත් විචාර දෙන්න තරම් ලොකු දැනුමක් මට නෑ.හැබැයි ඉතින් ෆිලුමෙ රොමෑන්ටික් සීන් වලට ඊට වඩා පැනි බේරෙන වචන ආවනම් හොදා කියල හිතුන.සමහර වෙලාවට හිතුනා යකූ මේක ක්ලැරන්ස් ගෙ කතාවද ඇනස්ලිගෙ කතාවද කියලත්.ඒ මොකද සාරංග කොලුවව පෙන්නුව වැඩිද මන්ද සමහර වෙලාවට.හැබැයි ඉතින් කතාව බලද්දි එන ෆැන්ටසිමය ජොලියට එව්වා බාධාවක් නෙවෙයි.ලොකු හරයක් කතාවක් නෑ තමයි ඒත් ජොලි මරු ෆිලුමක් .ඒ නිසා බැලුවට පාඩුවක් නෑ.

ආ..අපි ඉතින් ඔය ක්ලැරන්ස් මහත්තයගෙ සිංදු අහල තිබුන මිසක් ඊට එහා දෙයක් ලොකුවට දන්නෙ නෑ නොවැ.හැබැයි පහුගිය දවස්වල අපේ බ්ලොග් ලියන ඩ්‍රැකී මහත්තැන්ගෙ බ්ලොග් එකේ ක්ලැරන්ස් ගැන ලිපි ගනනාවක්ම පල උනා.ඒවායෙන් සෑහෙන දේවල් දැනකියා ගත්ත.එයා ඒ ලිපි මාලාව දාලා ඉවර වෙන්න කලින් ෆිලුම බලපු එක මට මාර සතුටක්.