මමයි ඒ බඹරින්දු කඩුපුලට පෙම් බැන්ද !

අහම්බෙන් නිදි බිඳුණු වෙලාවක නෙත ගැටුණු
සුවඳින්ම ඇතුලු හද ගැඹුරටම ගිනි තබපු
ලෝකෙටම හොර රහසෙ අඳුරු රැය විනිවිදපු
නුඹද ඒ මල උදා ස්වයං වරයෙදි නොදුටු

සඳත් මල්වර රෑක විදා පෙති රහසේ
මුදත් මල් මකරන්ද නොපෑහී පහසේ
හෙටත් නුඹ පිපේනම් මෙතන මේ වාගේ
මටත් පුලුවන් ඉතින් නො'නිදන්න ආයේ

රාත්‍රිය නො'යිඳුල්ම පිනි ඉහින මානේ
පිපී සැලෙනා අරුම හිනැහෙමින්  සිතුසේ
රසඳුනක් නොවී තව කිසිවෙකුට ආයේ
තුරුල්ලට වරෙන් දැන් මැණික නුඹ මාගේ

සඳේ රැස් කැරැල්ලෙන් නුඹ මුවා කරලමී
කදෝකිමි ඇසකිනුත් නුඹේ රුව සඟවමී
දහක් කුසුමන්ට ලොබ බැන්ද සිත මුදවමී
නෑඹුල්ම මලක පෙති දෝතින්ම සිපගමී