මේ ප්‍රේමයම මනරම් !

සියල්ල අහවරයැයි
සිතෙද්දීත්
යලි යලිත් යලි යලිත්
හද කොනොති ගහන
ඒ හැඟීමට
ඉතින් මා
ප්‍රේමයයැයි කියමි

සියල්ල ශුන්‍ය වී
හදවත සෝදාපාලු වී
ගිය පසුත්
හද බිතෙහි ඇලවුනු යමක්
අංකුරයක් වී
නැගී සිටිද්දී
එකී සෙනෙහසට
අවසානයක් නැති බව
ඉතින් මා අදහමි

සියල්ල සිහිනයකට පවරා
සැබෑවෙන් වහං වෙන්නට
සිතෙන වාරයක් වාරයක් පාසා
සැමරුම් සිහිවටන
ඇස් අඟිසි අවුලවන
සංතාපයට
ඉතින් මා ඉඩදෙමි

අවසානයේදීත් ,
ඉවරයි කියල හිතුවට
ඉවර නැති කතාවක
පැටලි පැටලී
විඳින විඳවන
ඒ නොතේරෙන හැඟීමට
ඉතින් මා
ප්‍රේමයයැයි කියමි