සඳට බැළුම් හෙලූ අය

සඳවතී මං

My photo
රෑ අහස එළිකරන... සිත් අහස සරසවන... තරුවකට පෙම් බඳින... සොඳුරු සඳවතිය .... මං...

Feb 23, 2017

මහලු නොවූ ප්‍රේමයක අරුමය !






ගොම්මනේ අඳුර වැටෙනකොට ගෙපළ මත
කඩාගෙන පිච්ච මල් වට්ටියක් සුදට සුද
පුරෝගෙන හිනා කට , ගොඩ වෙද්දි ගෙට
සැවැන්දරා පුසුඹයි ඉස්සර වගෙම නුඹ ළඟ

හැට පැන්නත් ඉළන්දාරි තාම මගෙ හිත
ගැස්සෙනව නුඹ ළඟදි අදත් නිතරම
හතර පෝයටම සිල් ගන්න නුඹෙ අතිනුත් ඉඳ
හිට
ඒකමයි ගිලිහෙන්නෙ නොදැනිම නවගුණ වැල

පින් පුරා නැග එද්දි පුර පෝය හඳ
අල්ලගෙන රැළි වැටුණ නුඹේ සුදු අත
කලා සොළසම පිරුණු මේ සදේ සෙවනැල්ල යට
තුරුල් වෙන්න ආසයි ඔය ළයට ආයෙම

හිස තියා ඔය ළයට පෙර පුරුදු ලෙස
විඳිනකොට මේ දිවියෙ නිරාමිස සුව
සිල් සුවඳ මුහු වෙච්ච නුඹේ පුසුඹට
ආදරෙයි මැණිකෙ මම එදා වාගෙම

ජීවිතේ මහ දුරක් එක්ව එක ලෙස
මා එක්ව ආව පින නුඹට එය ඇත
ජීවිතේ ගිම් නිව්ව නුඹෙ සෙනෙහෙ ළඟ
මේ දැන්ම මියැදුනත් එයයි මගෙ සැප

Feb 18, 2017

සීගිරි ළඳක් මෙතෙක් නොකී කවක් !




මහා ඝන වනයකින් වටවුනු - නොසැලෙනා පර්වතක අරණේ
නේක සුඛ විහරනෙන් අගතැන් - මාළිගාවකි එ' ගිර මුදුනේ
සුරා සොඬෙකුය ස්ත්‍රි ලෝලී - තම පියත් ඔහු මරා දැමුනේ
කසුප් රජුගේ අන්ත:පුරයට - මාව කුදලන් ඇවිත් තිබුනේ

සඳුන් ගල්වා පැනින් නහවා - කසී සළු මට ඇන්දුවා
මරඟනන් සේ ළඳුන් මා වට - කරන් මගෙ වත සැරසුවා
කැළේ පනිමින් දොලේ නටමින් - උන්නු මට මා සිහිඋනා
අදින් පසු මං ගැන මටමවත් - අයිති නැති බව තේරුනා

දෙවඟනක් සේ මාව හැඩ කොට - රජ්ජුරුවන් හට පේ කලා
සුරා බී මත් වෙච්ච නාළාගිරි - ඇතා සේ ඔහු දිස්වුනා
දුටු මතින් ඔහු මාව කුදලා - සිරියහන වෙත විසි කලා
ගිජිදෙකුගෙ එක පයට යටුවුන - කැකුළු සිරුරම පොඩි උනා

මගේ මංගල මධුසමේ එක- රැයින්
රැයින් එලෙසින් නිමාකෙරුනා
ඉරුණු දිව සළු ගුළිකරන් - මං මඟුල් යහනින් පිටත උන්නා
හෙටින් එළිවෙන අලුත් දවසට - තවත් එකියක් බලන් උන්නා
මහා බලකොටු අතර හිරවුන - මගේ හිත මහ හඬින් ගැහුනා

මගේ තනිකම කඳුළු කර කර - පවුරෙ කැටපත් ලියා තැබුවා
නෙතට උලෙළක් වෙච්ච දසුනක් - පවුරෙ තනිවුන විටදි දුටුවා
මගේ වත රසඳුනක් වුන ඒ ඇස් - දෙකේ පෙම දොරෙ ගැලුවා
මාළිගාවේ සිත්තරණෝ - දකිනකොට හිත විදුලි කෙටුවා

රාජ උදහස දැන දැනම ඒ - පෙම්බරාණෝ මවෙත ඇඳුනා
කිරිගරුඬ වන් මගේ රූපය ළඟදි - සිත්තර දැහැන් බිඳුනා
ඔහුගෙ හිත ඇඳි මගේ රූපය ඒ - ලෙසට එලෙසම ගලේ කෙටුනා
පහුවදා එළිවෙද්දි ඔහු ගත - කන්ද පාමුළ හෙලක තිබුනා

මහා උරුමය ලෙසින් ලොව දස - සිංහලේ උරුමය වෙලා
අදත් මේ ගිර හිදී නොසැලී - පෙමක නටඹුන් සඟවලා
එදා රජු මා දමා වැසු ඒ - අඳුරු ලෙනටම වී බලා
මගේ අවසන් හුස්ම තාමත් - සිංහ කට ළඟ හිර වෙලා


Feb 11, 2017

වැලන්ටයින් උඹ , ඇවිත් කරපු හරියක් !






ඉති ඒ එ' දවස
ආදරේ තිබුනේම
රතු රෝස පුසුඹක
කැන්ඩෝස් චොකලට් පෙත්තක
රුපියලෙන් රුපියල එකතු කර
හීනෙකට පාට දුන් පුංචි සුබ පැතුමක...

ඉති ඒ එ'දවස
ආදරේ තිබුනේම
කල්පෙකට වගේ එක දවසක
අතින්වත් අත ඇල්ලු මොහොතක
අන්න ඒ වගේ එක දවසක ළඟ ඉදන්
තොල ගෑව දම් පාට පෝටෙලෝ උගුරක....

ඉතින් ඒ එ'දවස
ආදරේ තිබුනේම
සුවඳ මුහු කල පාට කොළ වල
ලෝකෙටම හොරෙන් ලිව් කවි වල
දුන්න තරමක් හාදු දුන්නෙම
දෙතොල් සළකුණ තැබුව ලියුමක.....

ඉතින් ඒ එ'දවස
ආදරේ තිබුනෙ මුලු පපුවෙම
නොදැක්කට නොදෙඩුවට සතියම
මතක නිතරම තිබ්බෙ හිත උඩ
දැවිල්ලක් වගේ ඇස් අස්සෙම
කෙවි කෙවී තිබුනේ එකමෙක රුව...

ඉතින් ඒ එ'දවස
යටගිය දවස බරණැස
විශ්වයම අතැඹුලක් වෙන්න  කලකට පෙර
වැලන්ටයිනුත්  මෙහේ ඇවිත් නෑ එතකොට
ඉතින් ඒ ඉස්සරම ඉස්සර
ඇත්තමයි ආදරේ තිබුනෙ ආදරෙ ලෙස...



පසුවදන - මෙය ලියන්න උත්තේජකයක් උන 90 දශකයේ ගෙදරට හොරෙන් ආදරය කල අපේ අක්කගේ රස කතා වලට ඉස්තූති වේවා .ඒ කාලේ මෙහෙම සොඳුරු ප්‍රේමයක් විඳින්නට බැරි උන මම හරිම පව්.ඉතින් මම අපේ අක්කාට ඉත සිතින් ඊරිසියා කොරමි.

Feb 9, 2017

Cyber ප්‍රේමය !





Hi... කියල පටන් අරන්
Bye.... කියල ඉවරවෙද්දි
අතකින්වත් නාල්ලා
ළමයිත් හම්බවෙන
පාරිශුද්ධ ප්‍රේමය...

Feb 6, 2017

මට පිස්සු , නෑ අප්ප මේ හැටි !




තිබුනනම් මටත් ශෙන්යාට වගේ
හත්පෙති මලක්
එකම එක පෙත්තක් තියාගෙන
ඔයාගෙ ආදරේ වෙනුවෙන්
අනිත් සේරෝම පෙති
විසි කරනවා මං
ෆයිනැපල් ගැටෝ වලටයි

චොක්ලට් මිල්ක් ෂෙක් වලටයි
තිබුනනම් මටත් සින්ඩරෙල්ලට වගේ
හැඩ සපත්තු
යන්නෙ නෑ කුමාරයෙක් එක්ක උනත් නටන්න
රෑ දෙගොඩහරියෙ
ඇයි මොකෝ මට බැරිද නටන්නට
කාමරේ දොර වහන් තනියෙන්ම





තිබුනනම් මටත් ජැක්ට වගේ
බෝංචි වැලක් අහස උසටම
යන්නෙ නෑ මම නම් නිදා
ඉන්න යෝධයො ඇහැරවන්න
අනික මට මොහොකටද
රත්තරං උනත් බිජු දාන පාත්තයො
රස්තියාදුවෙ යනව අහසෙම
හිතුනොතින් නවත්තල යානයක්
ගන්නවා අයිස්ලන්තෙට ටිකට්






හිටියනම් මටත් මාෂාට වගේ
දුඹුරු බෝල වලහෙක්
ඇත්තමයි දඟ කරන්නෑ මං
මාෂා වගේ නෙවෙයි හරි හොදයි මං
ආදරෙයි වලස් තඩියො උඹට මං





හිටියනම් මටත් ෆියෝනට වගේ
කොල පාට බඩ මහත රාක්ශයෙක්
උම්මනම් දෙන්නෙ නෑ සත්තමයි
කරන්නට වේවි මට දාස කම්
ඒත් උඹ දන්නවද රාස්සයො
අපේ ගෙදරටම හොද මං තමයි













Feb 3, 2017

සංසාර ආදරේ රස දැනේ !



සෙංකඩගල අහසේ සඳ මල පිපිලා
සක්මන් මලුව පුරා සඳ රැස් වැටිලා
තහනම් මල් සුවඳින් සියොළඟ සැළිලා
මගෙ පපුවට තුරුලුව නිදන්න ප්‍රමිලා

වාසල උයන් කොනේ තල මම පිපිලා
බඹරුන් පියඹනවා මල් රොන් සොයලා
රෑ සඳ මෝරනවා සෙනෙහස පුරලා
දස්කොන් සකිසඳ මේ බලන්න හැරිලා

සෙංකඩගල කිරුළට මෙහෙසිය වීලා
මදුරාපුරෙන් ආපු කුමරිය ප්‍රමිලා
රෑ මැද නුඹ තනිකර යන මගහැරලා
සෙල්ලම් නිරිඳුට නෑ නුඹෙ රස දැනිලා

කන්දෙන් එහා අන්න ළා ඉර නැගිලා
තව මොහොතකින් යාවි මේ රැය නිවිලා
දස්කොන් මගෙ ළය මත ඔය හිස තියලා
තව  පාරක් කියන්න ආදරෙ කියලා

සීමා පවුරු උඩින් මේ බැමි සිඳලා
පන රැකුනොත් එනවා සත්තයි සොයලා
මගෙ හද විලේ පිපුණු සියපත ප්‍රමිලා
අසිපත ළඟ නොහැරෙමි මේ පෙම බිඳලා