මේ දවස්වල ඇහෙන එව්ව !!

 ඔන්න මේ සතියේ නම් බ්ලොග් එකට කවි කතා ලියන්න වෙලාවක් නෑ.ශනිදා දහයට හෝ ගාලා වැටෙන පෝස්ට් කියවල මහන්සි නම් මේ පැත්තෙ ආවොත් අද පුලුවන් ලස්සන සිංදු ටිකක් අහන්න.සංගීතය කියන්නෙ කැම බීම වගෙම මනුස්සයෙකුට ඕන දෙයක් කියලයි මටනම් හිතෙන්නෙ.අනික ඉතින් ඕනම මූඩ් එකකදි ගීතයක් කියන්නෙ ඒ ඒ මූඩ් එකට අනුවර්තනය වෙමින් රස විඳින්න පුලුවන් දෙයක් නෙ.ඔය කවුදෝ කෙනෙක් කියලත් තියෙනවනෙ

" when you are happy you enjoy music but when you are sad you understand  the lyrics "

ආන් ඒ නිසා මේන් මේ දවස්වල මම නිතර අහන මට නිතර ඇහෙන සිංදු ටිකක් ඔයාලා එක්ක බෙදා ගන්න හිතුවා.හැබැයි මේ තියෙන්නෙ අර all time favorites කියන මගේ ලිස්ට් එකේ එදා මෙදා තුර සදාකල් තියෙන එව්වා නෙවෙයි.එහෙම එව්ව බොහොමයක් බ්ලොග් එකේ මීට කලින් දාල තියෙන නිසා ඒවාම ආයෙත් දාලා වැඩක් නෑනේ.ඔන්න එහෙම කියනකොට මට මතක් උනේ මීට අවුරුදු ගනනාවකට කලින් බ්ලොග් ලෝකය මේ කාලේ වගේම නිද්‍රාවකට අහුවෙලා ඉන්න සමයක ඉයන්ගෙ ගීත 16 ක සිංදු රැල්ලක් ආවා.ඒ කාලෙත් නිදාගෙන හිටපු අපි ඇහරවලා බ්ලොග් වල මකුළුදැල් කඩා දාලා ගන්න ඒ රැල්ල සමත් උනා.මගේ ඔය හිත ඉල්ලන සිංදු කියන ලේබල් එකට ගියානම් ඒ පෝස්ට් එහෙමත් බලාගන්න පුලුවන් වෙයි.

හරේ..ඔන්න දැන් පටන් ගමු වැඩේ.

 1 -  ( guli mata )මේ දවස් වල නිතර ඇහෙන ගීතයක්.ටික්ටොක් වලට නැතුවම බැරි එකක් වගේ ඒ ඇප් එකට ගියොත් ඇත්තන් මේක තමා ඇහෙන්නෙ.මේ දවස්වල මගේ කටෙත් මේක නිතර මිමිණෙනවා.ආ ඕකට සිංහල එකකුත් තියෙනවා.ඒකත් ලස්සනයි

2 - ( වැහි නොඑනා ඉඩෝරෙකි ) කාලෙකට පස්සෙ හිතට වැදුන පද පෙලක්.අලුත් ගායකයො ගායිකාවො හතු පිපෙනව වගේ බිහිවෙන නිසාම ඉස්සරවගේ නම් ගම් මුහුණු මතක තියාගන්නත් අමාරුයි.සේරම එක වගෙයි.සිංදුත් එක වගෙයි.දිනේශ් තරංග කියන්නෙ මං කැමති ගායකයෙක් නෙවෙයි ඒත් මේක නම් මගේ හිතට වැදුනා..

3 - ( පිහිතුඩෙන් ආදරේ ලිව්වේ )මේ දවස් වල ට්‍රෙන්ඩ් එක අමු කල්චර් එකේ අමු සිංදු.ඒ වොයිස් එක මරු.එයාගෙ සමහර සිංදු වලට මාර කැමතියි.ඒත් සමහර එව්ව අමු වැඩී වගේ.කැමතිම ඒවායෙනුත් කැමතිම එක මේක.පිහිතුඩෙන් ආදරේ ලිව්ව අය අපි හැමෝගෙම ජීවිත වල ඉන්න පුලුවන්.අපේ ලියපු අය වගේම අපි ලියපු අයත් ඇති.

4 - ( නුඹ මට නොකියනා )මේකත් ටික්ටොක් වල ඇහිලා ආස වුන නිසා හොයාගෙන අහපු එකක්.මේක ඩ්‍රාමා එකක සිංදුවක්.ඩ්‍රාමා එකනම් බලන්නෙ නෑ ඒත් සිංදුවට කැමති.අහන්න හිතෙන සිංදුවක්.

5 - නොපෙනෙන සේ රැඳී  ) මේකත් ඩ්‍රාමා එකක.කියාදෙන්න ආදරේ තරම්.මුල් කාලේ මේක බැලුවා.පස්සෙ එපා වෙලා නැවැත්තුව.ශශිකා නිසංසලා කියන්නෙ මං කැමති ගායිකාවක්.මේ සිංදුවටත් පුදුම තරම් කැමති.

6 -  (  සබඳිනී මා ඔබේ )සිංදුව ඇවිත් ටික කාලයක් උනත් නිතර නිතර මේකනම් තාමත් අහනව.ඒ කියන්නෙ මේක all time favorite ගනයට ඉදිරියේදි වැටෙන්න පුලුවන්.පදවැල් විතරක් නෙවෙයි ඒ වොයිස් දෙකට ඒ විශුවල් එකට පට්ට ආසයි.

7 - ( naam dil rakh diya) shreya Ghosal කියන්නෙ ඉතින් භාවනාවක් වගේ අහන් ඉන්න ආස වොයිස් එකක් මටනම්.මේ ඉතින් මං එයාගෙ ටික දවසක ඉදන් අහන සිංදුවක්.මේකට නානාප්‍රකාර කවර් සෝන්ග්ස් එහෙම තියෙනවා.ඒත් මං ආස මේකට.ආ සිංහල වර්ශන් එකකුත් තියෙනවානේ." ඔබ මගෙ හදවතේ පැලදුවා " කියල.ඒකත් අහල බලන්න.

8 - ( ලොවීනා ) ඇත්තටම චිත්‍රාල් සෝමපාල කියන්නෙ කවදාවත් මං අහන්න ආසයි කියල හිතුන කටහඬක් තිබුන කෙනෙක් නෙවෙයි  ඒත් කාංචනා එක්ක කියන මේ ලොවීනට නම් නම මාර විදියට බැඳුනා.කාංචනා කියන්නෙ ඉතින් මේ කාලේ තාරුණ්‍යයේ උන්මාදයටනෙ.එයාගෙ වොයිස් එකටනම් මං මනාපයි කොහොමත්.ඒ වොයිස් දෙක මෙච්චර ලස්සනට බ්ලෙන්ඩ් වෙයි කියල හිතන්නවත් බෑ.ඒත් අපූරු පද පෙලකට චමත්කාර සංගීතයකට මොනාද අප්පා කරන්න බැරි.

9 - ( unstoppable) මේක නිතරම අපේ ඉස්තලන් කොලුවා අහන සිංදු වලින් එකක්.ඕක මන්තරේ වගේ ඇහිල ඇහිලම මටත් පොඩ්ඩක් හිත ගියා.ඒකෙ පොටි පොසිටිව් වයිබ් එකකුත් තියෙන නිසා අවුලක්ම නෑ.

10 - ( yelili yelila ) මේකත් ඉතින් පොඩි බඩ්ඩගෙන් අහලා කනට හුරු වෙච්ච එකක්.දැන් ගොඩක් වෙලාවට ගෙදර ඇහෙන්නෙ එයාගෙ ෆේවරිට් එව්ව තමා අපි සිංදු අහන්නෙ ඉයර්ෆෝන් වලින් තමා.දුකට කරුණ සිංහල පරණ සිංදු වලට එහෙම ඉස්තලන්ගෙ කිසිම මනාපයක් නෑ.මං නිකං එයාට ඇහෙන්න කියල දාල තිබ්බත් මොනාද අම්මෙ මේ  අනේ ඕවා එපා අපි මේක අහමු කියල එයාගෙ ජෙනරේශන් එකේ එකක් තමා දාන්නේ.හ්ම්ම් ඕවා ඉතින් ඔහොම තමා.

හරි ඉතින් දහයක්ම තියෙනවා නෙ මෙතන අදට ඒ ඇති කියල හිතෙනවා.ලිස්ට් එකනම් තව දිගට තියෙනවා.ටක් ටක් ගාලා මතකෙට ආපුවා තමයි මේවා.ඇත්තටම මේවා ඉතින් මහා ලොකුවට දැනෙන සිංදුම නෙවෙයි වචන උනත් කොච්චර ඇහුවත් මතක හිටින්නෙත් නෑ.එහෙම බලනකොට මීට අවුරුදු විස්සකට විසිපහකට එහාදී අහපු සිංදු තාම කට පාඩම්. මතක් කර කර විඳින විඳවන කටපාඩමින් මුමුණන සිංදු ලිස්ට් එකට එන්න නම් මේවාට පුලුවන් වෙයිද මංදා.කොහොම උනත් ඉතින් මේවා මේ දවස්වල අහනවා ඇහෙනවා.