මැජිකල් ගෑනු !

පහේ කණිසමට හෙමිහින් යුග යහනින් බසින්නී
මුදාහැරුනු දිගු වරලස හිස් මුදුනින් තබන්නී
අයිස් පෙට්ටි පාත්තියෙන් නෙක එළවළු නෙලන්නී
මල්ටි කුකර් එකේ බහා මල්ට් රයිස් උයන්නී

සාරි ඔසරි ස්කර්ට් පෑන්ට් දවස් පහට අදින්නී
බස් එක මිස් වෙන දවසට ඌබර් එකට නගින්නී
හවසට යන එන අතරට කීල්ස් එකට දුවන්නී
ඉහින් කනින් බඩු මලු ගෙන ගේට්ටුවෙන් එබෙන්නී

සා පැටවුන් නිදිකර we ටයිම් එකද හොයන්නී
ගල්වා නෙක සඳුන් සුවඳ සිරි යහනට වඩින්නී
නට්ස් කකා කෝපි බිබී කේ ඩ්‍රාමද බලන්නී
නිවාඩු දවසට පස්සට එලිවෙන තුරු නිදන්නී

දුක හිතුනම වෙල් ගනන් නොකා නොබි අඩන්නී
මල පැන්නම මායම් වී මහා කාලිට අදින්නී
මහා තනියක් දැනෙනා විට සිංදුවකට නිවෙන්නී
දොරත් වහගෙනම හිතුනම හති එන තුරු නටන්නී

හිටපු  ගමන් ඉබාගාතෙ වින්ඩෝ ශොපින් කරන්නී
ස්ට්‍රීට්ෆුඩ් වල රිංගා රස මසවුළු සොයන්නී
කවි පොතකට වහ වැටුනම ඒකෙන් ගොඩ නොඑන්නී
රෑ ජාමෙත් ඇහැරීගෙන විරහ ගීත ගයන්නී

පවුල කියන කොටුව වඩා සෙනෙහස් දැල  එලන්නී
ආදරේම බෙද බෙද නිති සුව පහසුව සදන්නි
ගවුම නැතත් බිම ගෑවෙන ලාලිත්‍යය රකින්නී
මතු බුදු වෙන්නට නොසිතා මව්වත් කම දරන්නී