කසාදය හරි ඉක්මනට දික් වුන !

ගිය සතියෙ පොකුරු වැහි බ්ලොග් එකේ තිබුන 

දික්කසාදයෙන් පසු

නිර්මාණය සෑහෙන්න හිතට වැදුනා.පොකුරු අක්කත් ඒක ලියල තියෙන්නෙ මිතුරියකගේ එහෙම දේකට සංවේදී වෙලා බව කියල තිබුන.ඒ නිර්මාණය කවි කොටස් දෙකකට ලියල තිබුනෙ.මුල් කොටස ඒ සිදුවීමට මුහුණ දුන් ස්ත්‍රිය හෝ පුර්ශයා යන දෙදෙනාටම හිතෙන දැනෙන පොදු සිතුවිලි වගෙ.ඒත් දෙවෙනි කොටස ගැහැනියකගේ සිතින් කියල පැහැදිලිවම පෙනෙන්න තියෙනව.මං පුද්ගලිකව නිර්මාණයක් හැටියට වැඩියම කැමති මුල් කොටසට.ඒක හිතට දැනෙන වැදෙන විදිය වැඩියි.අන්න එහෙම වැදෙන නිර්මාණකදි තමා මටත් ඉබේම සිතුවිලි පහල වෙන්නෙ.ඉතින් මේ තියෙන්නෙ පොකුරු අක්කගෙ කවි කියවල මට  ඒ සිදුවීම දැනුන හැටි. ඒ කවියේ තියෙන සිතුවිලි පරාස දෙකෙන් පස්සෙ ගැහැනියකට දැනෙන තවත් විදියක් තමා මේ.හා හා ඉතින් මේක කියවන්න කලින් කට්ටිය ඒක කියවලා එන්න එතකොට තමා මේක හොදට විඳින්න පුලුවන් වෙන්නෙ.

******************************
හුදකලා වැරන්ඩා පුටුව මත
දිනපතා පුවත් පත හූල්ලන
අමතක වීමකින් නිතර උදැසන
පිරෙනවා other half කොටපු මග් එක

ගෙයි උයනෙ මල් පිපුනෙ ඒ ඉස්සර
දැන් පාලුවට ගිහින් හරි මූසලයි පැත්තම
අසල්වැසි සෙබඩියෙක්  තියාගෙන හොට තාප්පෙට
අහනවා කෝ දැන් ඒ මාල ගිරා ජෝඩුව

අල්මාරියට පරිස්සමෙන් විසිකල
හොරාගත් එමරල්ඩ් පාට කමිසෙට
කාටවත් කියන්නේ කොහොමද මම
අදත් හොරැහින් දුන්න බව හාදුව

ශාරුක්ට රිදෙනකොට අඬන්නට
එහා පස උරහිසක් නැති කොට
ඇත්තටම කොයිතරම් සොඳුරුයිද
පොප් කෝන් බෙදාගෙන කන එක

දුරුත්තේ හීතලම තැන් වල
නුරාවෙන් හෙලූ දාඩිය බිද
සිහිවෙද්දි යුගල යහනක සුව
තනි යහනෙ සෝක ගිනි ඇවිලෙන

ඉන්න පැත්තක් බලං බත් කන්න
වත් පැතුවෙ නැති බවයි ඇත්ත
යනෙන මඟ අහම්බෙන් හෝ තැනක
දකින එක තමයි දැන්නම් පැතුම

මං "ආසම"කියල හිත රවටගෙන
අද  කරන්නෙත් "ඔයා ආසම" දෙය
ඇත්තමයි මට මේ පිස්සුද
කවුද කියන්නෙ මං ආයෙ single බව