ආදරණීය කසුන් !

ආදරණීය කසුන් ...

ඔයා දන්නවද...
පිච්ච මල් පුරවපු වතුර කළෙන් නාලා
ගෙට ඇවිත් දවස් දෙකක් යන්නත් කලින්
මම ඔයාට ආදරෙන් පිස්සු වැටුන....
එහෙම කිව්වට ඉතින් මම ඒ වෙනකොට ආදරේ ගැන
මෙලෝ හසරක් දැනගෙන හිටියෙ නෑ
ඒත් ඔයා ගැන... ඔයාගෙ සුදු නංගි ගැන කියවල
එදා මම අඬපු තරම්
වස්සානයේ පිටු අදටත් සාක්කි දරනව....
කසුන්.....
ඔයාට ආදරේ කරපු තරමටම මම
වෙලාවකට සුදු නංගිට ඊරිසියා කලා
කොටින්ම මට ඒ දවස්වල ඕන උනා
මගේ නම චාපා ගංඟාදරී කියල වෙනස් කර ගන්න
ඒත් ඉතින් යාන්තන් අවුරුදු දොළහක් වෙච්ච
බටු කෙල්ලෙකුට පුලුවන්ද එච්චර හපන් කමක් කරන්න...
ඇත්තමයි ....කසුන්.....
මම ඔයා නිසා කොච්චරනම් හිත රිදව ගත්තද.....අඬා වැටුණද....
ඔයාගෙ ආදරෙන් පිස්සු වැටිල සති ගානක්
යනතුරුම මම හිටියෙ පා වෙවී වගේ
යෞවනේ එළිපත්තට අඩිය තියද්දිම ඔයා මගේ පපුවට දුන්නෙ
එසේ මෙසේ ගින්දරක් නෙවෙයි කසුන්......
ඔයාගෙන් රිදුණු හිත යාන්තන් සුවපත් වෙන්න ගත්තෙ
දුයිෂෙන් මගේ ලෝකෙට එබ්කම් කරන්න
පටන් ගත්තට පස්සෙ
ඒත් මගේ පළවෙනි ආදරය වෙච්ච ඔයාව
අමතක කරන්න මට පුලුවන් කමක් තිබුනෙ නෑ
එහෙමයි කියලා දුයිෂෙන්ට බෑ කියන්නත් හිතක් තිබුනෙ නෑ
කසුන්.....
මම ඔයා එක්ක පබ්ලික් ලයිබ්‍රි එකේ එකම මේසෙ දෙපැත්තට වෙලා
ඇස් වලින් දාහක් දෙවල් කතා කරන ගමන්ම
හිම මිදෙන හීතලේ ස්ටෙෆ් මිටියාවතේ වැතිරිලා
දුයිෂෙන් එක්ක අහසෙ තරු ගණන් කලා...
අනේ කසුන්......
අන්තිමට මටම මම ගැන චී.... කියලා හිතුන....
කොහොමද එකම විදියට එකම තරම් එක පාර
දෙන්නෙක්ට ආදරේ කරන්නෙ....?
ඒ නිසා මම ඔයාල දෙන්නව හිතින් කිරල බැලුව
එක පාරක් නෙවෙයි දහදොළොස් වතාවක්ම කිරල බැලුව
දන්නවද කසුන්....
කොහොම බැලුවත් ඔයාගෙ පැත්ත පෝ.....ඩ්ඩක්... උඩින් ...
ඉතින්...මම මගේ විජාතික පෙම්වතාව
හදවතේ ගැඹුරුම තැනක ලො.....කූ ඉඩක් දීල  හැංගුවා.
ඉතින් දැන් කාටවත් කියන්න පුලුවන්ද මම මහ චපල කෙල්ලෙක් කියල
අහන්න කසුන්....
එදා ඉදන් මේ වෙනකනුත් මම ඔයාට
එකම විදියට ආදරේ කරනව කියල
මේ කියනකන් ඔයාවත් දන්නෙ නෑ නේද....?
ඔයාගේ සුදු නංගි තරමටම
නෑ... නෑ... නෑ....
ඊටත් වඩා ඔයාට ආදරේ කල ..කරන
මම ,

සොඳුරු සඳවතී ...